Saturday, January 16

कतारमाथिको नाकाबन्दी हट्यो, साउदीसँगै तीन देशले सबै सम्बन्ध पुनर्स्थापित गर्ने

January 6, 2021 30

दोहा : साउदी अरेबियाले साँढे ३ वर्षदेखि कतारमाथि लगाएको नाकाबन्दी हटाएको छ । साउदी अरबियाको अल उला
शहरमा मंगलबार भएको गल्फ कर्पोरेशन काउन्सिल (जीसीसी)को ४१ औँ सम्मेलनमा नाकाबन्दी हटाउने बारे औपचारिक सहमति भएको हो ।

कतारका अमीर शेख तामीम बिन हमद अल थानीसँगै कुवेतका अमीर शेख नवाफ अल-अहमद अल-जाबेर अल सबाह, साउदीका राजकुमार मोहम्मद बिन सलमान बिन अब्दुलाजीज अल सउदले सम्झौता पत्रमा हस्ताक्षर गरेका छन्
यस्तै, बहराइनका राजकुमार सलमान बिन हमद अल खलिफा, युएईका उपराष्ट्रपति शेख मोहम्मद बिन रशीद र ओमानी उप प्रधानमन्त्री फहद बिन महमूद अल सैदले उक्त सम्झौता पत्रमा हस्ताक्षर गरेका छन्। सम्झौतापत्र अनुरुप साउदीले कतारसँगको एयरस्पेस, भूमि र समुद्री सीमा सोमबार मध्यराति देखिनै खोलिसकेको छ ।

सम्मेलनपछि पत्रकार सम्मेलन गर्दै साउदी अरेबियाका विदेशमन्त्री फैसल बिन फरहान अल सउदले साउदी अरेबियासँगै युएई, बहराइन र इजिप्टले पनि हवाई उडानसहित कतारसँगको सबै सम्बन्ध पुनर्स्थापित गर्ने सहमति भएको जानकारी दिए ।

कतारले इस्लामिक अतिवादीहरुलाई प्रायोजन गरेको आरोप लगाउँदै साउदीले नाकाबन्दीको नेतृत्व गरेको थियो । साउदीको कदमलाई खाडीका अन्य मुलुकहरु युएई, बहराईन र इजिप्टले पनि साथ दिएपछि कतार घेराबन्दीमा परेको थियो ।

प्रतिकृया दिनुहोस्