Wednesday, November 25

कोरोना संक्रमणबाट एकैदिन आठको मृत्यु, मृतकको संख्या ९१ पुग्यो : स्वास्थ्य मन्त्रालय

August 12, 2020 141

काठमाडौं, २८ साउन । नेपालमा पछिल्लो २४ घन्टामा थप आठ जना कोरोना संक्रमितको मृत्यु भएको छ । काठमाडौं र धादिङका १÷१, सप्तरी, मोरङ, कपिलवस्तु र बाराका १/१, धनुषाका २ गरी एकैदिन आठ जना कोरोना संक्रमितको मृत्यु भएको हो । योसँगै कोरोना संक्रमित मृतकको संख्या ९१ पुगेको छ ।

नेपालमा कोरोना संक्रमणबाट एकैदिन आठ जना मानिसको मृत्यु भएको यो पहिलो पटक हो । ह्याम्स अस्पतालमा उपचाररत् निलकण्ठ नगरपालिका वडा नं १४, धादिङका ३२ वर्षीय एक पुरुषको मृत्यु भएको छ

निमोनिया, खोकी तथा श्वासप्रश्वासमा कठिनाइ भएपछि २७ गते नै उनी ह्याम्स अस्पतालमा भर्ना भएका थिए । आइसीयु भेन्टिलेटरमा उपचाररत् उनको २७ गते नै कोरोना पुष्टि भएको हो । यसैगरी पाटन अस्पतालमा उपचारत जनकपुरकी ३८ वर्षकी महिलाको पनि कोरोनाबाट मृत्यु भएको छ ।

मेडिसिटिमा साउन ५ गते भर्ना भएका जनकपुरका ७१ वर्षका बृद्धको कोरोना भाइरस संक्रमणले मृत्यु भएको स्वास्थ्य मन्त्रालयले जनाएको छ । निमोनिया, श्वाशप्रश्वासमा समस्या आई भर्ना भएका वृद्धलाई ७ गते कोरोना पुष्टि भएको थियो ।

किष्ट मेडिकल कलेजमा पनि उपचारका क्रममा काठमाडौं महानगरपालिका १२ टेकुकी ७८ वर्षीया एक महिलाको मृत्यु भएको छ । उनको मृत्युपछी कोरोना पुष्टी भएको हो ।

किष्ट मेडिकल कलेज मै उपचाररत् बारा, कलैयाका ७५ वर्षीय एक पुरुषको मृत्यु भएको छ । साउन २६ गते अस्पताल भर्ना भएका उनको २८ गते कोरोना पुष्टी भएको हो ।

त्यस्तै मोरङको बुढीगंगा गाउँपालिका २ गंगाचोकका ५५ वर्षीय एक पुरुषको बिपी कोइराला स्वास्थ्य विज्ञान प्रतिष्ठान धरानमा उपचारको क्रममा मृत्यु भएको छ । मृत्युपछी कोरोना पुष्टि भएको हो ।

सप्तरीमा उपचारका लागि अस्पताल लैजाने क्रममा एक कोरोना संक्रमित पुरुषको बाटोमै मृत्यु भएको छ । सप्तरीस्थित डाक्रेश्वरी नगरपालिका वडा नं ८ घर भएका राजविराज नगरपालिका वडा नं ६ सिराहारोडमा बस्दै आएका ७२ वर्षीय पुरुषको मृत्यु भएको स्वास्थ्य मन्त्रालयले जनाएको छ ।

कपिलवस्तुमा पनि एक ४२ वर्षीय पुरुषको बुधबार बिहान मृत्यु भएको छ । ज्वरो तथा निमोनिया भई साउन २५ गते उनी बुटवल कोरोना विशेष अस्थायी अस्पतालमा भर्ना भएका थिए ।

भेन्टिलेटरमा उपचाररत उनको २७ गते कोरोना पुष्टि भएको छ । यसरी गत २४ घण्टामा कोरोना संक्रमणबाट ८ जनाले ज्यान गुमाएका छन् । कोरोनाबाट ज्यान गुमाउनेको संख्या ९१ पुगेको छ ।

प्रतिकृया दिनुहोस्